Courage teikneserien
Denne teikneserien, utvikla av Hege Fimreite og Håvard Legreid og illustrert av Legreid, er ein visuelt sterk og pedagogisk tolking av bokkapittelet «EX-PED-LAB workshops and the courage to co-create» (Fimreite mfl., 2026) i antologien «Confronting the polycrisis: Contributions from early childhood education and care for a sustainable future» (Andreadakis & Oropilla, red.). Gjennom bilete, dialog og symbolikk blir komplekse teoretiske omgrep som polykrise, samskaping, polyfoni og mot gjort konkrete og tilgjengelege.
Teikneserien løftar spesielt fram mot som mental og moralsk styrke: evna til å halde ut usikkerheit, motstand, frykt og vanskelege val. Formelen Mot + Uthaldenheit = Visdom går som ein raud tråd gjennom framstillinga og knyter enkeltpersonar sine erfaringar til ei større forteljing om profesjonell og etisk utvikling. Polykrise blir skildra som eit samansett landskap av kriser og utfordringar som gjer kvardagen meir krevjande for institusjonar, barnehagelærarar, utdannarar, studentar og interessenter. I denne konteksten blir EX-PED-LAB–verkstadene presenterte som «tredje læringsrom», som dynamiske, innovative og inkluderande møter mellom ulike der nye innsikter kan oppstå og mot til samskaping kan vekse fram.
Gjennom scenar og situasjonar viser teikneserien korleis ulike former for mot (fysisk, moralsk, kreativt og sosialt) flettar seg saman i pedagogisk praksis. Lesaren blir invitert til å lytte til seg sjølv, andre og gruppa, til å sleppe taket i vanetenking, tradisjonelle roller og etablerte forventningar, og til å sanse og observere omgjevnadar med eit ope sinn. Teikneserien tematiserer korleis ein kan kople seg på djupare endringskrefter gjennom ope hjarte, vilje og tanke, og korleis det å omfamne kaos, i staden for å regulere kvar einaste stund, kan opne for nye praksisar, produkt og tankesett.
Særleg sentralt i teikneserien står ideen om sårbarheit som styrke. Ved å erkjenne at vi ikkje har alle svara, blir læringsfelleskap meir autentiske og gjenkjennelege, og det skaper rom for delt utforsking. Endra kontekstar og arbeidsformer blir framstilt som verktøy for å løfte fram stemmer som ofte ikkje blir høyrde. Slik blir motet til å samskape synleg gjennom det å tole mangesidige perspektiv, polyfoni og det ukjende.
Avslutningsvis peikar teikneserien framover mot nye læringsmiljø, håp og draumar, utprøving av nye metodar og framveksande visjonar. Forteljinga viser korleis samarbeid, iterasjon og delt læring kan bidra til å forme meir motstandsdyktige og berekraftige framtider. Courage to create blir ikkje berre eit slagord, men eit visuelt og forteljarmessig uttrykk for kor viktig det er at vi alle vågar å prøve ut, feile, lære og skape nytt – saman.
